АҞӘА, жьҭаара 29 - Sputnik. Аԥсны ахада Аслан Бжьаниеи Урыстәыла атранспорт аминистр Витали Савельеви Москва еиԥылеит. Абри атәы аанацҳауеит ахада ипресс-маҵзура.
Аганқәа рылацәажәеит атранспорттә инфраструктуреи аҳаиртә еимадара аиҭахацыркреи рызҵаарақәа.
Иара убасгьы иазааҭгылан аганқәа рыбжьара атранспорт аусхк аҟны ԥхьаҟатәи аусурақәа.
Уаанӡа Аԥсны ахада Аслан Бжьаниеи Урыстәыла ахада Иусбарҭа анапхгаҩы ихаҭыԥуаҩ Дмитри Козаки, Урыстәыла Ашәарҭадаратә хеилак амаӡаныҟәгаҩ ихаҭыԥуаҩ Рашид Нургалиеви, Урыстәыла аиҳабыра рхада ихаҭыԥуаҩ Александр Новаки реиԥылара мҩаԥысхьеит.
Аԥсны ахада Москваҟа амҩа дықәлеит жьҭаара 25 рзы. Жьҭаарамза иалагӡаны Аслан Бжьаниа ҩынтәны усутә ныҟәарыла Москваҟа дцеит. Атәыла ахадас дыҟоуижьҭеи Москваҟа аусутә зҵаарақәа рыӡбаразы зынӡа жәантә дцахьеит.