АҞӘА, абҵара 2 – Sputnik. Аԥсны Ашәарҭадаратә маҵзура иаанарԥшит 2015-2017 шықәсқәа рзы Аинвестпрограмма аплан иалаз аобиектқәа рҿы аилагарақәа. Абри атәы аанацҳауеит амаҵзура асаит.
Адырраҭараҿы ишазгәаҭоу ала, иахәҭаз аҭахрақәа ирықәшәом аҳәынҭқарратә ҳәаа иаԥну Ԥсоу аӡиас аҟәара арӷәӷәашьа.
Агхақәа аарԥшуп Очамчыра араион аҿгьы. Уаҟа амҩақәа: Џьонуа, Шьынқәба, Ваинахтәи, Папасқьыр, Ладариа рҿы аӡцарҭеи ацрыҵцарҭатә цәаҳәақәеи еиҭашьҭаҵан.
"Аҭакԥхықәра здыз аилахәырақәа рнапхгаҩцәа ирыҿцәажәан. Аамҭа рыҭан ахыбрақәа рҿы авариатә ҭагылазаашьа аԥырхырц. Иара убасгьы иазырхиан аремонт-еиҭашьақәыргыларатә усурақәа рыплан", - аанацҳауеит АШәМ.
Аобиектқәа рыргылараан иҟаз агхақәа иахьатәи аамҭазы шьаҭанкыла рҭыԥ иқәҵоуп.
Аԥсны АШәМ Акапиталтә ргылара аусбарҭа аҟазауаа ирабжьнагеит Ԥсоу аӡиас аҟәара ԥхьаҟа абгара алмыршаразы аҭагылазаашьа хылаԥшра арҭаларц.