АҞӘА, абҵара 3 - Sputnik. Аҟәа аиҳабыратә хыбрақәа – ахада Иусбарҭа, Аминистрцәа реилазаара, Апарламент рыхьчара рӷәӷәоуп.
Абҵара 3 рзы Аԥсны Апарламент аҿы имҩаԥысраны иҟоуп аилатәара. Аилатәара амшхәаԥштә иазҵаараны иҟоуп аамҭалатәи аусуралымшареи амедицина-социалтә експертизеи рымҩаԥгара ахәҭа аԥсахрақәа ралагалареи "2021 шықәсазтәи Ареспубликатә биуџьет ази", "2021 шықәсазтәи Аԥсны Атәанчахәытә фонд абиуџьети" рзы азакәанқәа аԥсахрақәа рылагалареи.
Иазԥхьагәаҭоуп апарламенттә усутә гәыԥ аԥҵара аветеранцәа рзы азакәан апроект аус адуларазы.
Уаанӡа Аԥсны жәлар Рџьынџьтәылатә еибашьра аветеранцәа рзеиԥш Хеилак Аҩнуҵҟатәи аусқәа рминистр Дмитри Дбар имаҵура аанижьрацы аҿагыларатә акциа мҩаԥгахоит абҵара 4 рзы ҳәа алаҳәара ҟанаҵеит.
Абҵара 3 рзы Аԥсны ахада аҩнуҵҟатәи аусқәа рминистр Дмитри Дбар имаҵурахьы дирхынҳәит.