АҞӘА, абҵара 3 – Sputnik. Аслан Галазов иусумҭа "Чик ихәыҷра" акинофестиваль Нальчик "Ҟабарда-Балкариа-100" аҿы идырбан. Абри атәы аанацҳауеит Sputnik Аахыҵ Уаԥстәыла.
Ауснагӡатә аҿы афильм ӡырыргеит апродиусер Леила Теблоевеи актиор Артур Хатагови.
Теблоева иазгәалҭеит афильм аԥсуа идоуҳа аанарԥшуеит ҳәа. Актиор Хатагов, ацәгьоуҩы Моти ироль назыгӡоз, данқәыԥшыз Аԥснытәи аҳәынҭқарратә акәашаратә ансамбль далахәын.
"Ақырҭуа-аԥсуа еибашьра ианалага 70 процент ансамбль алахәылацәа сара сахьҭырхуаз аепизод ахьымҩаԥысуаз аҭыԥ аҿы иҭахеит. Уи саҳахьан, аха сылала исымбацызт. Аҭыхрақәа ҳанрылага аԥхьа исцәыцәгьахеит, аха хаҭала издыруаз ауаа рбаҟа анызба, исылымшашазгь сылшеит", - ҳәа иҳәоит Хатагов.
Sputnik Аахыҵ Уаԥстәыла афильм арежиссиор Аслан Галазов иажәақәа еиҭанаҳәоит.
"Сгәы иаанагоит Чик ҳаамҭазтәи ахәаԥшҩы дидиԥхьалоит ҳәа. Ихәыҷу ракәым, идуугьы. Чик иҵоуроу фырхаҵоуп. Уи адагьы Чик ухихуеит иԥсабаратәрала, ихәыцым, ихыҭҳәаам иинтеллект ала. Иара дыҟаҵәҟьоуп. Аиҳаракгьы иахьатәи ҳаамҭазы ацифратә, аҳатә уҳәа аҿыцрақәа рыцхыраарала ауаҩы иласӡаны ихаҭара аныӡуа, еиԥшу ауаа аналаҵәо аԥсҭазаара. Сара исҭахуп ахәаԥшҩы дархәыцырц, ииашоу амҩа ҳанума ҳәа иҳәарц. Иҟалап анасыԥ атехнологиақәа мацара ирыдҳәаламзар. Иҟалап анасыԥ - уи ауааи аԥсабареи ракәзар? Ауаҩы ауаҩы изы диашьазар, дҩызазар ҟамлои? Абри иазхәыцырц сҭахуп иахәаԥшуа. "Чик ихәыҷра" уи аҩыза алшара рнаҭоит", - ҳәа иҳәоит арежиссиор.
Акинофестиваль уажә фынтәуп Ҟабарда-Балкариа имҩаԥысуеижьҭеи. Ижәларбжьаратәхахьеит. Иара иалахәуп Германиа, Ҟазахсҭан, Узбекисҭан, Белоруссиа, Ермантәыла.
Ауаԥс режиссиор Аслан Галазов Фазиль Искандер ирҿиамҭа "Чик ихәыҷра" ашьаҭала акинофильм ҭихит 2019 шықәсазы Аԥсны.
Афильм иалахәын 70-ҩык актиорцәа.
Зегьы аԥснытәиқәа ракәын. Ароль хада наигӡеит 14 шықәса зхыҵуаз Давид Ҵулукьиа.