Сынтәа "Акурорт Пицунда" аҟны 33 нызқьҩык инареиҳаны аԥсшьаҩцәа рыдыркылеит , 2019 шықәсазы урҭ рхыԥхьаӡара 28 нызқьҩык рҟынӡа ыҟан, иҳәеит еидҵоу аԥсшьарҭақәа реиҳабы Фрикан Гәынба арадио Sputnik аефир аҟны.
"Ԥарала иугозар, 2021 шықәсазы 515 миллион инареиҳаны иҳарҳаит, 2019 шықәсазы 382 миллион рҟынӡа ҟаҳҵеит. Ауалафахәы ашьҭыхра атәы ҳҳәозар, зда ԥсыхәа ыҟам аусзуҩцәа - аӡәӡәара знапы алаку, акрыфарҭақәа рҟны аилыргаҩцәа аԥара рзацаҳҵеит. Уи сынтәа 102 миллион мааҭ рҟынӡа артәеит, 2019 шықәсазы уи ауалафахәы 76 миллион мааҭ рҟынӡа ыҟан. Сынтәа ашәахтәқәа ԥшьынҩажәа миллион мааҭ рҟынӡа алаҳгалеит, 2019 шықәсазы – ҩынҩажәи жәибжь", - иҳәеит Гәынба.
Иара иазгәеиҭеит "Акурорт Пицунда" иаҭаауа ишахәҭоу рыдкыларазы аусзуҩцәа рганахьала ауадаҩрақәа шрымоу. Зус бзианы издыруа ауасҭацәа, асантехникцәа, аилыргаҩцәа, ахәынаҳаҩцәа уҳәа рыгуп аԥсшьарҭаҩнқәа.
Фрикан Гәынба убасгьы дазааҭгылеит "Акурорт Пицунда" иаҵанакуа аԥсшьарҭатә хыбрақәа рҭагылазаашьа зеиԥшроу, иарбан цхыраароу ирҭаху атәы.