Жьҭаара 27 рзы Аԥыза-министр Александр Анқәаб аусутә еилацәажәара мҩаԥигеит "Амшынеиқәафымцамч" аиҳабы инапынҵақәа аамҭала иназыгӡо Ҭенгиз Гырџьынба далархәны. Гырџьынба иааигаз арбагақәа инарықәыршәаны ажьырныҳәа инаркны цәыббранӡа 38% роуп еизгоу афымцалашаразы, ҵыԥх 35% маҷк инархыҳәҳәон ари аамҭазы.
Лыхны ақыҭа ахада Џьансыхә Чкотуа арадио Sputnik аефир аҿы иҳәеит ақыҭаҟны ҩажәи хәба процент иназынаԥшуа афымцалашаразы ашәатәқәа ылыргоит ҳәа.
"Ҳкәадоуп. Абонентцәа 1147 –ҩык ҳамоуп, аԥара зшәо 25 процент роуп. Аиаша уҳәозар, хәҩык рҟынтәи ԥшьҩык ирызшәаӡом. Аԥсуа тәанчахәы мацара зауа, зхәыҷқәа ааигәа иҟам ирцәыуадаҩуп аԥара ашәара. Егьыс анаплакқәа иҟоу, урҭ иахәҭоу ршәоит. Уажәы иаагозар, Лыхны иаду аиланхарҭа Бамбора асасааирҭақәа ыҟоуп, урҭ иршәоит. Уа инхои асасааирҭақәа змоуи 30-40 % рҟынӡа афымцамч ахә ршәоит", - иҳәеит Чкотуа.
Иара иажәақәа рыла 2018 шықәса инаркны иахьанӡа ақыҭауаа афымцалашаразы ирықәу ауал 14 миллион мааҭ инацны иартәоит.