АҞӘА, абҵара 9 - Sputnik. Аԥсны ахада Аслан Бжьаниа Даниель Ортега Никарагуа ахада иалхраҿы иигаз аиааира идиныҳәалеит. Абри атәы аанацҳауеит ахада ипресс-маҵзура.
"Аԥсны Аҳәынҭқарра ажәлар рыхьӡалеи, хаҭала сара сыхьӡалеи ишәыдысныҳәалоит Ареспублика Никарагуа ахада иалхраан ижәгаз аиааира. Иреиҳаӡоу амаҵзурахьы шәеиҭалхра иаанарԥшуеит шәполитикатә хыԥша ҳаракы, Ареспублика Никарагуа атәылауаа имҩаԥыжәго аусқәа адгылара шарҭо", - аҳәоит адныҳәаларатә шәҟәаҿы.
Бжьаниа иазгәеиҭеит Аԥсны анапхгара аҵак ду шарҭо аиҩызареи аилибакаареи шьаҭас измоу аԥсуа-никарагуатә еизыҟазаашьақәа.
"Агәра ганы сыҟоуп ҳҳәынҭқаррабжьаратә усеицура наҟ-ааҟ аинтерес ззеицҳамоу аусхкқәа зегьы рҿы аҿиара шаиуа. Агәра згоит ҳаинырра еиҳа-еиҳа аҽшарҭбаауа, ҳажәлар рымарымажараз ишыӷәӷәахо", - иҩуеит Аԥсны ахада.
Бжьаниа Даниель Ортегеи иԥшәмаԥҳәыс, ахада ихаҭыԥуаҩ Росарио Мурильо Самбранеи ирзеиӷьеишьеит Никарагуа аҳәынҭқарратә зҵаарақәа рыӡбраҿы ақәҿиара дуқәа.