АҞӘА, абҵара 9– Sputnik. Аԥсны ахада Аслан Бжьаниа идикылеит Қырҭтәыла иҟоу Еиду амилаҭқәа реиҿкаара акоординатор Сабина Махль, ЕАР УВКБ адәнытә зҵаарақәа рзы абжьгаҩ Мариа Волошкевич. Абри атәы аҳәоит Ахада исаит.
Махль Аҳәынҭқарра ахада ҭабуп ҳәа иалҳәеит реиԥыларазы. Иазгәалҭеит аиҿкаара иаус хаданы иҟоу ауаа рыцхраара шакәу, убри инадҳәаланы ЕАР ахаҭарнакцәа ишырҭаху аусеицураз еиҳа еиӷьу ахырхарҭақәа рылацәажәара.
Бжьаниа ареспублика ацхыраара азҭо жәларбжьаратәи аиҿкаарақәа аус рыцура хра шаҵоу азгәеиҭеит.
"Шәара шәызҿу аус хра амоуп, ҳаргьы уи ахә ҳаракны иаҳшьоит. Жәаҩыла, шәҩыла ауаа ацхыраара рышәҭоит. Иҭабуп ҳәа ахаҳҳәаауеит", - иҳәеит Ахада.
Иара иҳәеит аԥхьаҟагьы дшазыхиоу жәларбжьаратәи аилазаарақәеи аиҿкаарақәеи аус рыцура.
Аиԥылараан ахада аҳәара ҟаиҵеит Бедиатәи ауахәама аиҭашьақәыргыларазы ацхыраара ҟарҵарц – ақьырсиан культуратә баҟак аҳасаб ала, Аԥсны реиҳа ақәра змоу ақьырсиан ԥшьаҭыԥк аҳасаб ала.
Иара убасгьы дазааҭгылеит, Аԥсни Қырҭтәылеи реизыҟазаашьа. Иҳәеит Аԥсны шазыхиоу аигәыларатә тәылақәа рыбжьара ацивилизациатә ҟазшьа змоу аҭагылазаашьа аԥҵара, аха уи азы хымԥада Қырҭтәыла Аԥсны ахьыԥшымра азханаҵар шакәу.