ГӘДОУҬА, абҵара 10 – Sputnik, Бадраҟ Аҩӡба. Аԥсны ахада Аслан Бжьаниа Гәдоуҭатәи аковид-госпиталь аусушьа гәеиҭеит абҵара 10 рзы.
Атәыла ахада изеиҭарҳәеит амедусҳәарҭаҿы иқәгылоу акомпиутертә томограф еиԥҟьарада аус ауеит ҳәа.
Бжьаниа иара убасгьы агоспиталь ҵәыҵәрила ишеиқәыршәоу атәы идырдырит. Аҳақьым хада Ҳаџьараҭ Шамба иҳәеит 2020 шықәса абҵарамзазы идыргылаз аҵәыҵәритә станциа аштаттә режим ала аус ауеит ҳәа, аҵәыҵәри азы еиԥҟьара ыҟам ҳәа.
Шамба иажәақәа рыла, аҭагылазаашьа уадаҩқәа раан 4 тоннак рҟынӡа аҵәыҵәри нырхуеит.
Агәабзиарахьчара аминистр Едуард Быҭәба иазгәеиҭеит арезервтә генератор аахәареи ақәыргылареи шазыԥхьагәаҭоу.
Гәдоуҭа араион ахада уаанӡа еиҭеиҳәеит ашықәс аҩнуҵҟа аковид-госпиталь ахь инанагеит 1871-ҩык ҳәа. Урҭ рҟынтәи 757-ҩык Гәдоуҭа араион ауааԥсыра роуп, агоспиталь аҿы рыԥсҭазаара иалҵит 349-ҩык, урҭ рахьынтә 94-ҩык араион ауааԥсыра роуп ҳәа иҳәеит араион ахада.