ГӘДОУҬА, абҵара 10 - Sputnik. Аԥсны ахада Аслан Бжьаниа иҳәеит Гәдоуҭа араион аҿы абизнес урыстәылатәи абанкқәа рҟынтәи льготала акредитқәа аиур ҟалоит ҳәа.
Иара иҳәеит апрограмма уаанӡатәи аетапқәа раан араион алахәӡамызт ҳәа.
"Аекономика аминистррахь идҵаалатәуп. Иахәҭоу аҭахрақәа еилкаатәуп, апроектқәа азырхиатәуп. Урыстәылатәи абанкқәа иалыркаауа апроектқәа ара инагӡахоит", - ҳәа иҳәеит Аслан Бжьаниа.
2015 шықәсазы Аԥсны аекономика аминистрреи Москва аинвестициатә маҵзуреи иаԥшьыргеит апрограмма – урыстәылатәи абанкқәа хԥа аԥснытәи анаплакыҩцәа 10% иҟоу льготала акредитқәа рыҭара алзыршо.
Акредитзоужьра иартәоит миллиардки 200 миллион мааҭ.