АҞӘА, абҵара 11 – Sputnik. Омбудсмен Асида Шьаҟрылԥҳа Апарламент ахада Валери Кәарҷиа иахь азыҳәа налышьҭит ирыдыркылаз Аԥсны ауаҩы изинқәа зыхьчо иаппарат ахарџьынҵа афинанстәи азинтәи шьаҭа леилиркаарц, аанацҳауеит омбудсмен лсаит.
Апарламент Аԥсны ауаҩы изинқәа зыхьчо иаппарат 2022 шықәсазтәи аныхрақәа шьақәнарӷәӷәеит. Ахарџьынҵа ишьақәнартәеит 4 миллионки 870 нызқь мааҭи. Ишьақәырӷәӷәоу ахарџьынҵа 2021 шықәсазы ирыдыркылаз иаҟароуп. Убри аан адепутатцәа аӡбамҭа рыдыркылеит уаанӡа ишҳәаз еиԥш 500 нызқь мааҭ ацрымҵарц.
Шьаҟрылԥҳа иналышьҭыз ашәҟәаҿы иалырбеит цәыббра 29 рзы адепутатцәа абиуџьет ацҵара заҭаху ҳәа зҵаара шлырымҭаз, рыӡбамҭагьы ҵаҵӷәык шадмырбаз.
"Уаанӡа ауаҩы изинқәа зыхьчо аппарат ахадеи, аҳасабеилыргаҩи, абиуџьети, акредиттә еиҿкаарақәеи, ашәахтәқәеи, афинансқәеи рзы аилак ахантәаҩы Натали Смырԥҳаи ҳаиԥыларақәа раан ҳаилибакааит аныхрақәак рыхәҭаҷқәа ишрыцҵатәу азы. Аилак егьырҭ алахәылацәа абри аганахь ала ргәаанагара еилкаам, ԥхынгәы 22, 2021 шықәсазы, цәыббра 14, 2021 шықәсазы, цәыббра 29, 2021 шықәсазы иҳанеиқәшәоз абри аганахь ала акгьы ахьырымҳәаз азы", - аҳәоит омбудсмен лышәҟәаҿы.
Иара убас Шьаҟрылԥҳа аҳәара ҟалҵеит 2022 шықәсазтәи Аппарат ахарџьынҵа апроект - 5 409 965 мааҭ азоушьҭразы еилацәажәарада мап зацәкыз леилдыркаарц.