АҞӘА, абҵара 16 – Sputnik. Гагра араионтә ААР Пицундатәи амилициа аҟәша аусзуҩцәа 1978 шықәса рзы ииз Дмитри Ефремов иԥшаара иаҿуп ҳәа аанацҳауеит Аԥсны ААР апресс-маҵзура.
Аусбарҭаҿы ирҳәеит Дмитри Ефремов дыӡит ҳәа амилициа рахь адырра ҟалҵеит иан абҵара 2 азы ҳәа.
"Уажәазы ишьақәыргылоуп Ефремов аԥсшьараан Алаҳаӡы ақыҭаҿы дынхон, жьҭаара 29 инаркны ихабар ыҟам ҳәа", - азгәарҭеит аусбарҭаҿы.
Аԥшааратә уснагӡатәқәа раан амилициа ирԥыхьашәеит Алаҳаӡы ақыҭан амшын аҟәараҿы Дмитри Ефремов имаҭәақәа, ампахьшьы, итәылауаҩшәҟәы.
Аамҭақәак рышьҭахь ирбеит Ефремов иҭел. Аамҭала дахьынхоз аҭыԥ аҿы ирбеит имаҭәақәа, 98000 мааҭ аԥара. Урҭ иан илыҭоуп.
Ахҭыс азы аматериал араионтә прокуратурахь инашьҭуп.