АҞӘА, абҵара 17 - Sputnik. Аԥсны аԥыза-министр Александр Анқәаб Урыстәыла Аекономикатә ҿиара аминистрреи Атранспорт аминистрреи рделегациа идикылеит ҳәа аанацҳауеит Аминистрцәа реилазаара асаит.
Аделегациа ахадараҿы дыҟоуп Урыстәыла Аекономикатә ҿиара аминистрра программа ҷыдақәеи апроект ҷыдақәеи р-Департамент адиректор Витали Гудин.
Аделегациа алахәылацәеи урҭ аԥснытәи рколлегацәеи Александр Анқәаб изеиҭарҳәеит Аинвестициатә программала инарыгӡо апроектқәа рҟны аусурақәа рцашьа. Ирылацәажәан апроблематә зҵаарақәа, урҭ аҭыԥ рықәҵашьа.
Аганқәа алацәажәеит 2022-2025 шықәсазтәи асоциал-економикатә программа абжьаратә проектқәа.
Хазы иалхны ирзааҭгылан ареспубликаҿы амҩақәа рҭагылазаашьа азҵаарақәа, Кәыдрытәи аиҩхаахь атранспорттә инфраструктура ареконструкциа аԥеиԥшгьы абрахь иналаҵаны.