АҞӘА, абҵара 20 - Sputnik, Асмаҭ Ҵәыџьԥҳа. Sputnik Аԥсны анапхгаҩы Руслан Бганба Аԥсны ажурналистцәа Реидгыла апрезидиум далахәылоуп.
Иара убас, апрезидиум иалахәхеит Аԥсны ажурналистцәа Реидгыла ахантәаҩы Руслан Ҳашыг, уи ихаҭыԥуаҩ Зураб Аргәын, ажурналистцәеи аидгыла алахәылацәеи Заира Ҵәыџьԥҳа, Владимир Ҳашба, Екатерина Бебиаԥҳа, Аҳәынҭқарратә телерадиоеилахәыра анапхгаҩы Ирина Агрԥҳа, Аԥсуа телехәаԥшра атематикатә дырраҭарақәа рредактор хада Асҭанда Қьецԥҳа, "Аԥсныпресс" аиҳабы Манана Гәыргәлиаԥҳа, апериодикатә ҭыжьымҭақәа реиҳабацәа: "Эхо Абхазии" – Витали Шариа, "Апсны" – Енвер Ажьиба, "Республика Абхазия" – Иури Ҟәарасқәуа, "Гагрский вестник" – Валери Орчыҟәба, "Бзыԥ" – Лаврент Гәбаз, "Алашара" – Анатоли Лагәлаа.
Аԥсны ажурналистцәа Реидгыла еиднакылоит ажурналистцәа, афотокорреспондентцәа, аредакторцәа, аҿиара знапы алаку арадио, ателехәаԥшра, аинформациатә маҵзурақәа русзуҩцәа реиԥш аҭыжьымҭақәеи, аҭҵаареи уҳәа ажурналистика знапы алаку зегьы.
Аԥсны Ажурналистцәа реидгыла аԥҵан 1968 шықәса ԥхынҷкәынмза 17 азы аиҿкаара аԥҵаратә еизараҿы.