АҞӘА, абҵара 22 - Sputnik. Урыстәылатәи Афедерациа Адәныҟатәи аусқәа рминистр Сергеи Лавров Аԥсны Аҳәынҭқарра Адәныҟатәи аусқәа рминистр Инал Арӡынба ихьӡала адныҳәаларатә шәҟәы ааишьҭит. Абри атәы аанацҳауеит аусбарҭа апресс-маҵзура.
"Ареспублика аҿаԥхьа иқәгылоуп жәларбжьаратәи апозициақәа рырӷәӷәареи арегионалтә ҭышәынтәалареи ашәарҭадареи ирзырхоу аус дуқәа. Урыстәылатәи аган арҭ ахықәкқәа рынагӡаразы ганрацәалатәи ацхыраара аҟаҵара ԥхьаҟагьы имҩаԥнагалоит", - ҳәа аҳәоит адныҳәалараҿы.
Аԥсны Аҳәынҭқарра Ахада иусԥҟала Инал Арӡынба Аԥсны Адәныҟатәи аусқәа рминистрс дҟаҵан 2021 шықәса абҵара 17 рзы. Ари аҭыԥ аҿы Инал Арӡынба диԥсахит 2016 шықәса раахыс министрс иҟаз Даур Ақаҩба.