АҞӘА, абҵара 23 – Sputnik, Бадраҟ Аҩӡба. Аԥсуа боксиор Енвер Бзагәа абокс азы аҟазаратә турнир далахәны аҩбатәи ареитингтә қәгылара мҩаԥигоит Москва абҵара 26 рзы. Абри атәы Sputnik иазеиҭеиҳәеит Аԥсны апрофессионалтә бокс Афедерациа ахада Алик Карди-оӷлы.
"Уаҵәы Москваҟа амҩа ҳақәлоит. Абҵара 25 азы официалла аспортсменцәа рықәгылара мҩаԥгахоит Енвер диндаҭлоит Челиабинсктәи аспортсмен Артем Вычкин. Уи аԥышәа змоу спортсменуп", - ҳәа иҳәеит иара.
Иахьазы Енвер Бзагәа адунеитә реитинг аҿы 623 аҭыԥ никылоит. Уажәтәи иқәгылараан аиааира игар аҭаӡҩыраҿ аҽа ҭыԥк ациҵоит.
"Ақәгылара ф-раундк рыла ишьақәгылоуп, хԥа-хԥа минуҭ ицоит. Енвер Бзагәа жьҭаара 11 азы Уфа имҩаԥигараны иҟаз аиндаҭлара апандемиаз иахыган. Уажәы аԥкрақәа аԥыхуп, аха ахәаԥшыҩцәа маҷхоит", - ҳәа иҳәеит Карди-оӷлы.
Аԥхьатәи ареитингтә қәгылараан Енвер Бзагәа атехникатә нокаутла аиааира игеит. Усҟан иара диндаҭлон урыстәылатәи абоксиор Виктор Конкин.