АҞӘА, абҵара 24 - Sputnik. Абҵара 24 рзы Гәдоуҭа араион аҟны изеихсыз амаршрутка аԥсҟы зкыз Елико Кокосқьериа ижәҩахыр хыџьара ирхәит, иара ахәшәтәырҭахь днагоуп. Абри атәы аанацҳауеит Аԥсны ААР апресс-маҵзура.
Иазгәаҭоуп апассаџьырцәа аӡәгьы ааха шырмоуз.
Аусҭҵаара адыррала, абҵара 24 асааҭ 08:30 рзы ареспубликатә мҩаду аҿы Хыԥсҭа ааигәара апассаџьырцәа зҭаз амаршрутка иеихсит.
Аԥсны ААР Гәдоуҭа араион аҟәша амилициа аусзуҩцәа Жәандәрыԥшь ақыҭаҿы иблыз амашьына ВАЗ-2114 рбеит. Иҟоу агәаанагарала, абри амашьыналоуп ацәгьоура шымҩаԥгаз.
Аԥсны ААР адыррақәа рыла, ихысуаз ихаҭара шьақәыргылоуп, аха аусҭҵаара аинтересқәа инарықәыршәаны уи дырзом.