АҞӘА, абҵара 28 - Sputnik. Урыстәыла Жәлар рартист, ашәаҳәаҩ, акомпозитор Александр Градски иԥсҭазаара далҵит Москва 73 шықәса дшырҭагылаз. Абри атәы аанацҳауеит "Пятый канал", ахыҵхырҭа адыррақәа шьаҭас иҟаҵаны.
Ахәаша АИХқәа адырра ҟарҵеит Градски аԥсеиқәырхарҭа дышҭашәаз, усҟан аҳақьымцәа адабла исит ҳәа агәҩара рыман. Амузыкант игәабзиара еиҭаԥеит цәыббрамзазы акоронавирус анихига ашьҭахь.
Градски диит абҵара 3 1949 шықәса рзы Челиабинсктәи аобласт Копеиск ақалақь аҿы. 1974 шықәса рзы иара далгеит Гнесинаа рыхьӡ зху Амузыка-педагогикатә институт (уажәы Урыстәылатәи амузкатә академиа) авокал акласс. 1975 - 1976 шықәсқәа раан аҵара иҵон Москватәи аконсерваториаҿы акомпозициа акласс аҿы (Тихон Хренников икласс).
Градски еицырдыруа амузыкатә телешоу "Голос" аҿы рҵаҩыс дыҟан. 2017 шықәса рзы ари адырраҭара иалахәыз Аԥснынтәи ашәаҳәаҩ Альдона Цкәуаԥҳа далихит, лырҵаҩыс дҟалеит. Лара апроект даналҵ ашьҭахьгьы иара итеатр "Градски-холл" ахь ааԥхьара лиҭеит.