АҞӘА, абҵара 30 - Sputnik. ЕАА Урыстәыла иаакәыршаны арратә базақәа дыргылоит, ҳәа иҳәеит Урыстәыла ААР аминистр Сергеи Лавров, А. М. Горчаков ихьӡ зху ауаажәларратә дипломатиа адгылараз Афонд аҭҵаарадырратә программа "Диалог во имя будущего" алахәылацәа рҿаԥхьа дықәгыло. Абри атәы аанацҳауеит РИА Новости.
"Еиду Аштатқәа иааҳакәыршаны арратә базақәа дыргылеит. Ари ашколхәыҷқәаҵәҟьа ирдыруа фактхеит. Ус шакәугьы иааҟәымҵӡакәа аԥсхықәкра аадырԥшуеит", - ҳәа иҳәеит аминистр.
ЕААи урҭ НАТО аҟынтәи рҩызцәеи аҵыхәтәантәи аамҭазы Амшын еиқәа аҵакыраҿы активла рхы аадырԥшуеит. Атәылахьчара аминистрраҿы ишырҳәо ала Аштатқәа рҽазыршәоит Урыстәыла аҳәаақәа рааигәа ар ргәыԥ аԥҵара. Вашингтон ахықәкқәа иреиуоуп — Украина арратә хархәара. Уажәы дара аҭагылазаашьа ҭырҵаауеит Донбасс иаҿыганы.
Убри аан Киеви мраҭашәаратәи аҳәынҭқаррақәеи Урыстәыла ар Украина аҳәаа рҽазааигәартәуеит ҳәа ицәажәоит. Урыстәыла уи аҭакс аҳәамҭа ҟанаҵоит ар иара аҵакыраҿ иахьаҭаху ишаргыло, уи аӡәгьы хьаас икыр шахәҭам.