АҞӘА, ԥхынҷкәын 6 – Sputnik. Аԥсны агәабзиарахьчара аминистр Едуард Быҭәба Ашәарҭадаратә хеилак аилатәараҿы аепидемиологиатә ҭагылазаашьа далацәажәеит, иҳәеит аҿкы шеиқәымтәац, уахыки-ҽнаки ачымазара здырбало рхыԥхьаӡара шыҟац иаанхоит, зыԥсҭазаара иалҵуагьы рацәоуп. Абри атәы аанацҳауеит Ахада ипресс-маҵзура.
Иара убас иазгәеиҭеит аковид-медусҳәарҭақәа рахь есҽны ачымазцәа шнарго, аҿкы уадаҩны ишымҩаԥысуа.
Ауаажәлар рыбжьара алаҵаҟаҵара еиҵахеит, иҳәеит Быҭәба.
"Иааидкыланы Аԥсны алаҵа ҟарҵахьеит 12 887-ҩык", - иҳәеит агәабзиарахьчара аминистр.
Быҭәба иажәақәа рыла, атәыла амедусҳәарҭақәа зегьы еиқәшәоуп иаҭаху ахәшәқәеи, ахыхьчагатә маҭәахәқәеи рыла. Иара убри аан акоронавирус ахәшәтәразы зыхә цәгьоу ахәшәқәа "Актемра", "Артлегиа" рзымхара ыҟоуп.
Ԥхынҷкәын 4 рзы иҟоу адыррақәа рыла, аепидемиа ҵысижьҭеи Аԥсны акоронавирус зцәа иаланы иаадырԥшыз ауаа рхыԥхьаӡара 35407-ҩык рҟынӡа инаӡеит, ргәы бзиахахьеит 28822-ҩык ауааԥсыра, рыԥсҭазаара иалҵхьеит 531-ҩык.