АҞӘА, ԥхынҷкәын 13 – Sputnik. Урыстәылатәи аруаа Аҟәа, асасааирҭа "Аиҭар" игылоу амобилтә ковид-госпиталь ақәҵра иаздырхиоит, урҭ арантәи иқәҵуеит ԥхынҷкәын 16 рзы.
Аԥсны агәабзиарахьчара аминистр Едуард Быҭәба Аԥсуа телехәаԥшра аефир аҿы иҳәеит Урыстәыла Атәылахьчара аминистрра иатәу хырхарҭарацәалатәи амобилтә госпиталь Аԥсны аусура ду мҩаԥнагеит, уажәшьҭа абжьааԥны иахьгылоу аҭыԥ ахь рҽеидкыланы ицароуп ҳәа.
"Урыстәылатәи ҳколлегацәа аусура ду ҟарҵеит. Уажәшьҭа дара абжьааԥны иахьгылоу аҭыԥ ахь рҽеидкыланы ицароуп. Иахьынӡаздыруа ала, дара ԥхынҷкәын 15 рзы ицоит. Уажәшьҭа аидара зегьы аԥсуа медицинатә еилазаара рыбӷа иқәлоит. Ԥхынгәы - нанҳәамзазы аизҳара шыҟаз еиԥш, уажәгьы ҳхала уи ҳаҿагылароуп", - иҳәеит Быҭәба.
Амобилтә госпиталь зынӡа 100 иара-ҭыԥ амоуп, аха ԥсыхәа амамкәа иҟалозар даҽа 50 ҭыԥ ацҵахар алшоны еиҿкаан.
Ԥшьымз рыҩныҵҟа амедицинатә цхыраара рыҭан ҩ-нызқьҩык инарзынаԥшуа Аԥсны ауааԥсыра.