АҞӘА, ԥхынҷкәын 14 - Sputnik. Еицырдыруаз арежиссиор Сергеи Соловьев 77 шықәса шихыҵуаз иԥсҭазаара далҵит ҳәа аанацҳауеит kinoteatr асаит.
Сергеи Соловьев диит нанҳәа 25, 1944 шықәсазы ақалақь Кемь аҟны. Ашкол данҭаз Ленинградтәи адраматә театр Ду аҿы дыхәмаруан.
1969 шықәсазы ВГИК арежиссиортә факультет далгеит. Аус иуан Ленинградтәи ателехәаԥшраҿы.1969 шықәса раахыс "Мосфильм" аҿы режиссиорк иҳасаб ала аусура далагеит.
Сергеи Соловьев еиҳа инарылукааша иусумҭақәа иреиуоуп: "Ахәыҷра ашьҭахь шәымш" ("Сто дней после детства") "Ашьҭрақәлаҩ" ("Наследница по прямой"), "Асса".
Ленинтә комҿареидгыла аԥхьахә ианашьан (1975), СССР аҳәынҭқарратә аԥхьахә ианашьан (1977) Урыстәыла жәлар рартист ҳәа ахьӡ ихҵан (1993).