АҞӘА, ԥхынҷкәын 19 – Sputnik. "Спутник V" аиҭалаҵаҟаҵара ҟалоит ес-фымыз рышьҭахь, иара убас ҵыхәаԥҵәарада ҳәа азгәеиҭеит Гамалеи ихьӡ зху амикробиологиеи аепидемиологиеи ринститут аиҳабы Александр Гинцбург.
"Ес-фымыз рышьҭахь "Спутник" алаҵа еиҭаҟоуҵар ҟалоит... Иашаны иазгәашәҭеит, ус ҵыхәаԥҵәарада", - ҳәа иҳәеит Гинцбург ателеканал "Россия 1" ала ицоз Наилиа Аскер-заде лфильм аҟны.
Акоронавирус аҟынтәи Аԥсны алаҵа рзыҟарҵоит урыстәылатәи апрепарат "Спутник V" ала. Ари адунеи аҟны раԥхьаӡатәи ашәҟәы иҭагалоу лаҵоуп акоронавирус арԥсыҽразы. Иара азхаҵара амоуп 70 ҳәынҭқарра рыҟны.
Иара убас, Урыстәыла иаԥырҵеит егьырҭ алаҵақәагьы: новосибирсктәи ацентр "Вектор" иаԥнаҵаз "ЭпиВакКорона", Урыстәылатәи аҭҵаарадыррақәа ракадемиа иатәу М.П. Чумаков ихьӡ зху Аиммунологиатә препаратқәа рыҭҵаареи аус рыдулареи рфедералтә ҭҵаарадырратә центр иаԥнаҵаз "КовиВак", "Спутник Лайт", ахбыџқәра азын "Гам-КОВИД-Вак М".