АҞӘА, ԥхынҷкәын 20 - Sputnik. Аԥсны ахада Аслан Бжьаниа идҵала Инар Ладариа Аԥсны азинмчра нагӡеи иҷыдоуи анапынҵақәа змоу ацҳаражәҳәаҩс дҟаҵоуп Никарагуа.
Адокумент анапы аҵаҩуп ԥхынҷкәын 17, 2021 шықәсазы.
Никарагуа Аԥсны Аҳәынҭқарра ахьыԥшымра азханаҵеит цәыббра 4, 2008 шықәсазы. Шықәсык ашьҭахь аҩ-тәылак рыҟны адипломатиатә еизыҟазаашьақәа шьақәыргылан.
Никарагуа Аԥсны Ацҳаражәҳәарҭа аартхоит 2022 шықәсазы. Адипмиссиа аартразы адҵа анапы аҵаҩуп 2021 шықәса абҵарамзазы.
Иара убас, сынтәа Аҟәеи Манагуеи ақалақь-еишьцәа ҳәа реизыҟазаашьа шьақәдыргылеит.