АҞӘА, ԥхынҷкәын 27 – Sputnik, Асмаҭ Ҵәыџьԥҳа. Аԥсны ажурналистцәа Реидгыла адипломқәа ранаршьеит аиндаҭлара "Зегь ҳаидгылан COVID-19 ҳаиааип" аҟны ииааиз. Ажурналистцәа Реидгыла ахантәаҩы Руслан Ҳашыг аусмҩаԥгатә аартуа иазгәеиҭеит Аԥсны АИХқәа русзуҩцәа апандемиа аамҭаз зегьы еидгыланы русура атәы.
"Зегы ҳхәыцуан цхыраарас иҟаҳҵари, ари ачымазара аиааираз аусура шԥеиҿкаатәу ҳәа. Зегь ирылшоз ҟарҵон. Уи ауп ихадарангьы иҟоу. Ажурналистцәа рхы иамеигӡакәа ҟазаҩаӡарала ирласны русура мҩаԥыргон", - иҳәеит иара.
Ателехәаԥшра ахьаӡҳәаҿ аԥхьахәқәа ҩба ранашьан Аԥснытәи аҳәынҭқарраҭә ателерадиоеилахәыра акорреспондентцәа Сариа Кәарацхьелиаԥҳаи Гәыгәыца Ҩарданԥҳаи. Кәарацхьелиаԥҳа лажәақәа рыла 2021 шықәса иуадаҩыз, аха хҭысла иҭәыз шықәсхеит. Лара изныкымкәа лколлегацәа дрыцны Гәдоуҭатәи аковидтә госпиталь даҭааит.
"Наҳәамзазы раԥхьаӡа акәны "ацәаҳәа ҟаԥшь" аачымазцәа збеит. Урҭ аҳақьымцәа рықәҟьашон. Еиқәдырхон. Сара уахь сышнеиуаз исзааигәаз ауаа ирыздырамызт. Аԥхьаҵәҟьа акоронавирус зеиԥшраз сыздырамызт, аха агоспиталь ахь анеира сацәшәомызт", - ҳәа еиҭалҳәоит лара.
Аԥсуа телехәаԥшра акорреспондент Сариа Кәарцхьиаԥҳа
© Sputnik / Томас Тхайцук
Аҩбатәи аԥхьахә анашьан ателееилахәыра "Абаза-ТВ" аинформациатә программа "Ажәабжьқәа раамҭа".
"Ҳара зегьы ҳҽеизаҳкит журналистцәақәак рыҳасаб ала. Ԥхьаҟа иҵегьы аусдҵақәа ҳаур ауеит. Аха иҟаҳҵо аԥхьаҟагьы иԥышәахоит", - ҳәа иҳәеит апрограмма аредактор Рустам Занҭариа. Аноминациа "Аинформациатә маҵзура" аҿы актәи аԥхьахә ланашьоуп Sputnik Аԥсны акорреспондент Сариа Кәарацхьелиаԥҳа. Лара илҳәеит ари аԥхьахә ишколлективтә ԥхьахәу, амаҵзура аусзуҩцәа рақәшаҳаҭрала афонд "Ашана" ишалҭо.
Аԥсны ажурналистцәа реидгыла аиҳабы Руслан Ҳашыг, Жәлар Реизара адепутат Алхас Џьынџьолиа, Sputnik акорреспондент Сариа Кәарцхьиаԥҳа.
© Sputnik / Томас Тхайцук
Аҩбатәи аԥхьахә ианашьоуп аинформациатә маҵзура "Аԥсныпресс" аусзуҩ Дамеи Касланӡиа. Уи адагьы аҳаҭыршәҟә ҷыдақәа ранашьан ажурналистцәа Наала Мықәԥҳа ателефильм "Пациент", Лиана Кәарҷелиаԥҳа ателедискуссиа "Битый час". Агәабзиарахьчара аминистр Едуард Быҭәба иазгәеиҭеит ажурналистцәа апандемиа иаалагазар ари атема хаданы ишахәаԥшуа.
"Амедицинатә еилазаара зегь рыхьӡала ҭабуп ҳәа сҳәар сҭахуп. Ажурналистцәа рус ҟарҵоит, иҟоу аадырԥшуеит. Иҭабуп зегьы. Агәабзиара шәоуааит", - ҳәа иҳәеит иара.
Ажурналистцәа реидгыла ҭабуп ҳәа рҳәоит атема аарԥшраҿы адгылара зуыз НИИЕПиТ АНА аиммунологиеи авирусологиеи рлабораториа аиҳабы Алиса Матуԥҳаи агәыҳалалратә еиҿкаара "Зегь ҳаӡәыкуп" ахаҭарнак Борис Барцыци рахь.