АҞӘА, ԥхынҷкәын 31 - Sputnik. Аԥсны ахада иԥшәмаԥҳәыс Очамчыратәи абжьаратә школқәа рҵаҩцәа Ашықәс ҿыц рыдылныҳәалеит, ҳәа аанацҳауеит Аԥсуа телехәаԥшра.
Иазгәаҭоуп, Атәыла ахада Аслан Бжьаниа иԥшәмаԥҳәыс Очамчыра араион ахадареи, ақыҭа ауааԥсыреи, ашкол анапхгареи, аҵаҩцәеи шылԥылаз.
Ашколхәыҷқәа ажәеинраалақәа ирыԥхьеит, азеиӷьашьарақәа ҟарҵеит.
Аелита Ахьиԥҳа ашколхәыҷқәа аҳамҭақәа раналшьеит, иааиуа Ашықәс ҿыц рыдылныҳәалеит, ирзеиӷьалшьеит агәабзиара, аихьӡарақәа.
"Бзиа шәаҳбоит. Ишәыдысныҳәалоит Иааиуа Ашықәс ҿыц. Аҵара бзианы ишәҵала, ашәҟәқәа шәрыԥхьала, аԥсҭазаара шәалагәырӷьала. Шәыԥсҭазаара аиӷьтәразы ҳара иҳалшо зегь ҟаҳҵоит", - лҳәеит Ахьиԥҳа.
Аҭаратәи абжьаратә школ аиҳабы Светлана Быҭәба ари ахҭыс ҭоурыхтәуп ҳәа ахылҳәааит, раԥхьаӡаакәны ари ашкол даҭааит Атәыла ахада иԥшәмаԥҳәыс.
Аракичтәи абжьаратә школ аҵаҩцәа Аелита Ахьиԥҳа ашәҭқәа лырҭеит, ажәеинраалақәа илзаԥхьеит.
Очамчыра араион аиҳабы Беслан Бигәаа ашколхәыҷқәа аныҳәа рыдиныҳәалеит, аҭынч ԥсҭазаара рзеиӷьеишьеит. Иара убас Аԥсны ахада иԥшәмаԥҳәыс ҭабуп ҳәа леиҳәеит иаалырԥшыз агәцаракразы.