АҞӘА, ажьырныҳәа 3 - Sputnik. ЕгрыГЕС аусра зыбзоуроу есыҽны Џьуартәи аӡеизакырҭа иалалар зыхәҭоу аӡы ауп ҳәа Sputnik иазеиҭаиҳәеит ЕгрыГЕС адиректор хада Леван Мебониа.
"Аԥсны Урыстәылантәи афымцалашара аиуа иалагеишьҭеи, ҳара аус аауеит аӡы иацло ала. Аӡеизакырҭа шаҟа аӡы ацло ааҟара иабзоурахоит иҳауа алашарагьы. Уажәазы аӡы иацло 40 куб рҟынӡа ауп, уи уахыки-ҽнаки рыла иартәоит 2,5-3 млн. кВт.с. Урыстәылантәи алашара Аԥсны иаиуаанӡа 9,5-10 млн. кВт.с. ыҟан", - ҳәа иҳәеит иара.
"Аԥсны ахәҭак ЕгрыГЕС аҟнтәи абаржә алашара шаиуа еиԥш иаанхар, анаҩсгьы ԥырхагада аус аулоит", - иҳәеит Мебониа.
Ԥхынҷкәынмза 21 инаркны Аԥсны аиҳара афымцалашара аиуеит Урыстәылантәи. Иахьатәи аамҭазы ЕгрыГЕС аҟынтәи алашара роуеит Гәылрыԥшь, Очамчыра, Гал араионқәа.