АҞӘА, ажьырныҳәа 11 - Sputnik. Акоронавирустә инфекциа аҽеиҭанакуеит, ачымазара ахк ҿыцқәа цәырҵыр ауеит, иааиуа хымз рызгьы ҭынчрахом ҳәа рҳәоит Агәабзиарахьчараз адунеизегьтәи аиҿкаараҿ. Абри атәы аҩуеит "Известия", EssexLive адыррақәа шьаҭас иганы.
Аекспертцәа иазырыԥхьаӡоит "омикрон" аҵыхәтәантәи штаммуп ҳәа агәыӷра ишаԥсам. Омикрон-штамм "дельта" аԥсахит, ачымазарагьы иазнарҳаит.
"Ари авирус аҽеиҭакшьала ацәеижь аҿы аҽеизнагоит, нас иаалырҟьаны ихәыҵҟьоит. Нас илаҟәуеит, еиҭахгьы иацлоит. Абас есхымз, ԥшьымз", - ҳәа иҳәеит ВОЗ ахаҭарнак Девид Набарро.
Мраҭашәаратәи атәылақәа рмедицинатә маҵзурақәа ачымазара аҿагылара рылшозар, иӷару атәылақәа рҿы уи уадаҩуп.
Амедицинатә ҭҵаарадыррақәа рдоктор Сергеи Токарев иҳәеит "омикрон" ԥхьаҟагьы ауаа рҟынтә аԥстәқәа рахь ииасуа, нас еиҭахынҳәуа ахы мҩаԥнагалар алшоит ҳәа.
"Омикрон" еиҳа изжәыло аиммунитет ауп. Иашьаҽуеит.
Амза алагамҭаз аҵарауаа ирҳәеит ицәырҵыр шалшо авирус ӷәӷәала зҽеиҭазкыз аформа (авирус-супермутант).
Апандемиа "омикрон" ала инҵәом, аԥстәқәа рҿы ицәырҵуа аиҭакрақәа ауаа рзы ишәарҭахар алшоит. Убри азы ВОЗ ааԥхьара ҟанаҵоит алаҵаҟаҵарази аԥкрақәа рықәныҟәарази.
Урыстәыла шәҩык рҟынӡа "омикрон" рыдбалоуп.