АҞӘА, ажьырныҳәа 13 – Sputnik. Аԥсны ашьхарақәа рҟны иаалырҟьаны аҳауаԥхарра аҽеиҭакра инадҳәаланы ажьырныҳәа 14-20 рзы Риҵатәи ареликттә парк иахьаҵанакуа асы маҷымкәа илеиуеит, абри атәы аҩуеит апарк аофициалтә аккаунт.
Иалшоит ахьҭа аҿалар, асыԥсақәа леиразы ашәарҭара ыҟоуп ҳәа рҳәоит апарк анапхгара.
Абри инадҳәаланы апарк анапхгара аҭааҩцәа рахь ааԥхьара ҟанаҵоит рхы рыхьчарц, иргәаладыршәоит Ауадҳараҟа ахаларазы аӡынра зегьы азин шыҟам.
Апарк амаҵзурақәа амҩақәа дрыцқьоит, есыҽны аԥслымӡ рықәрыԥсоит. Риҵаҟа аԥхынтә резинала ахалара азин ыҟам, Аԥсны ААИ уи иахылаԥшуеит.