АҞӘА, ажьырныҳәа 18 - Sputnik. Аԥсны аԥыза-министр Александр Анқәаб ареспублика асанитар ҳақьым хада Лиудмила Скорик лнапы ианиҵеит ақәыԥшцәеи ахәыҷқәеи рыбжьара ОРВИи ОРЗи ахылаԥшра алҭаларц, амчыбжь нҵәаанӡа ихымԥадатәиу ауснагӡатәқәа рзы аинформациа азырхиазарц. Абри атәы аанацҳауеит Аԥсны Аминистрцәа реилазаара асаит.
Лиудмила Скорик аиҳабыра рхада иԥылараан агәҭынчымра аалырԥшит ареспиратортә вирустә инфекциа ахәыҷқәа рыбжьара аҽахьарҭбаауа азы. Лара илҳәеит 2022 шықәса раԥхьатәи 17 мшы рыҩнуҵҟа Аԥсны ашәҟәы иҭагалоуп 949-ҩык ОРВИи ОРЗи змоу ахәыҷқәа ҳәа.
Уи адагьы атәылаҿ иҟоу аепидемҭагылазаашьа атәы далацәажәеит.
Аԥсны Асанитар-епидемиологиатә маҵзура адыррақәа рыла атәылаҿ амза аҩнуҵҟа имҩаԥгоуп 4 552 ҭҵаара, 975-ҩык акоронавирустә инфекциа рыдбалоуп, рыԥсҭазаара иалҵхьеит 17-ҩык.
Ииасыз ашықәс абри аамҭазы имҩаԥган 6 624 ҭҵаара, иаарԥшын 1 635 чымазаҩ.