АҞӘА, ажьырныҳәа 18 - Sputnik. Краснодартәи атәылаҿацә аҵакыраҿы агәҽанҵарақәа ԥшьба рылаҳәоуп, ҳәа аанацҳауеит арегион аоперативтә штаб.
Атәылаҿацә агидрометцентр аинформациала ажьырныҳәа 19 ашьыжь инаркны ақәа ӷәӷәаны илеиуеит, ақәабаасабаа ҟалоит, аԥша аццакыра 20-25 м/с, раионқәак рҿы – 29м/с инаӡоит.
Ҟәбан аӡиас алада-мраҭашәарахьтәи агани (Гориачи Клиуч, Северски, Абинсктәи араионқәа) Амшынеиқәатә ԥшаҳәа иатәу аӡиасқәеи (Геленџьик, Тҟәаԥс араионқәа) шьҭыҵыр алшоит.
Краснодартәи ашьхарақәа рҿы асыԥса леир ауеит. Шәача акәзар ас ду иазыԥшуп.
Ажьырныҳәа 18 азы Анапа иахьаҵанакуа 20-25 м/с. аԥшасра ҟалоит, амшынцәқәырԥара– 1,5-2,5м.