АҞӘА, ажьырныҳәа 28 – Sputnik. Аҟәатәи ақалақьтә ӡбарҭа Лев Аргәын, Лариса Кәакәасқьырԥҳа рыҩнытә баандаҩра аҿҳәара иацнаҵеит 2022 шықәса лаҵара 28-нӡа, абри атәы аанацҳауеит аусбарҭа асаит.
Аӡбаҩ Милана Џьынџьалԥҳа Аԥсны ААР аусҭҵааратә усбарҭа ахашшаара дахәаԥшит. Аӡбарҭа аҳақьым хада Лев Аргәын, ахимиотерапиа аҟәша амедеҳәшьа хада Лариса Кәакәасқьырԥҳа рыҩнытә баандаҩра аҿҳәара иацнаҵеит. Аусҭҵаара цоит ахәшәтәырҭа аусзуҩ Нелли Лагәлааԥҳа лганахь алагьы.
Ақәҵара ахашшаара ҟалоит Иреиҳаӡоу аӡбарҭаҿы хымш рыҩнуҵҟа.
Аԥсны Амилаҭтә кьыбачымазаратә центр амедусзуҩцәа рганахь ала ашьаусҭҵаара иалаган. Акьыбачымазара зыхьуа хәшәыла реиқәыршәаразы Аҳәынҭқарратә программа инақәыршәаны ахимиа-гормонтә хәшәқәа роураан ачымазцәа рамбулатортә картақәеи амедицинатә маҵзура ахәԥсашәаратә шәҟәынҵаҿы имцыз адыррақәа анырҵон ачымазцәа ахимиатерапиа иахысуазшәа, иара убри алагьы аҳәынҭқарра абиуџьет аԥхасҭа ду аҭан.