АҞӘА, жәабран 3 – Sputnik. Аԥсны Аҳәынҭқарратә ҳазалхратә еилакы аконтрабанда аҿагыларазы аҟәша аусзуҩцәа иааныркылеит закәаншьаҭада аҳәаа иахыргоз аҭыҭынаалыҵи аҿырхиагақәеи, абри атәы аанацҳауеит аҳазалхратә еилакы асаит.
Ажьырныҳәа 31 2022 шықәсазы аушьҭырҭатә ҭыԥ "Егры" аҟны Қырҭтәылаҟа аҳәаа иахысуаз аԥҳәыс илыдырбаеит ԥшьнызқь ҭоԥ асигарет. Атауар аҭыԥантәи акциз адырга ақәын. Азинеилагаразы аусҭҵааратә шәҟәқәа нашьҭуп Аҳәынҭқарратә ҳазалхратә еилакы ахь.
Иара уи аҽны аҳазалхыҩцәа Аҟәа аоперативтә-ԥшааратә уснагӡатәқәа мҩаԥыргеит. Аҳҭнықалақь аҟны Аԥсны атәылауаҩ лымаҭәа гәарҭеит. Лара илыдырбалеит 70 нызқь мааҭ рыхә аҿырхиагақәа. Атауар Аԥсныҟа иалагалан аҳазалхратә закәан еилаганы. Азинеилагаразы административтә хараԥса лықәҵоуп.