АҞӘА, жәабран 7 – Sputnik, Асмаҭ Ҵәыџьԥҳа. Аԥсны адәныҟатәи аусқәа рминистрра аҽазнархиоит амедиацентр аартра, иара хықәкы хадас иамоуп Аԥсны апозициа Жәларбжьаратәи аинформациатә политикаҿ арӷәӷәара. Абри атәы Sputnik иазеиҭалҳәеит Аԥсны Адәныҟатәи аусқәа рминисрра апресс-маӡаныҟәгаҩ Анна Гамсаниаԥҳа.
Лара лажәақәа рыла, амедиацентр аусзуҩцәа жәларбжьаратәи аинформациа, адунеитә АИХқәа, асоциалтә ҳақәа анализ рзыҟарҵалоит, Аԥсны аҳаҭыр шьҭызхуа аинформациатә усхкқәа мҩаԥыргалоит.
Амедиацентр аҿы имҩаԥыргалоит жәларбжьаратәи аиҿцәажәарақәа, авидеоцҳақәа, онлаин-еилацәажәарақәа, Аԥсны ААР Аколлегиа аилатәарақәа, Аԥсны ААР Ауаажәларратә хеилак аилацәажәарақәа.
"Ари амедиацентр аҟны имҩаԥыслоит адәныҟаполитикатә ус иадҳәалоу ауснагӡатәқәа онлаин-и оффлаин-и русушьала. Ҳара ҳзы акраҵанакуеит Аԥсны иадҳәалоу аинформациа аларҵәаразы ари аҩыза алшара аиура. Уажәы уи мҩаԥгахоит урыстәылатәи ҳколлегацәа иҟарҵо адгыларала", - лҳәеит Гамсаниаԥҳа.
Аҳәаанырцәтәи асасцәа алархәны амедиацентр мчыбжьқәак рнаҩс аофициалла иаартхоит.
Амедиацентр аплатформа "Аԥсны аԥеиԥш" ацхыраара анаҭоит, аусура напхгара азиулоит Адәныҟатәи аусқәа рминистр Инал Арӡынба.