АҞӘА, жәабран 10 - Sputnik. Ацәыргақәҵатә зал хада аҭааҩцәа рзы жәабран 14 инаркны иаартхоит ҳәа Facebook аҿтәи лдаҟьаҿы адырра ҟалҵоит азал адиректор Ельвира Арсалиаԥҳа.
Акультуратә сезон ҿыц аартхоит ацәыргақәҵа "Ашықәс азы иреиӷьу аусумҭа" ала.
2021 шықәса ԥхынҷкәынмзазы аԥкрақәа ирхырҟьаны ацәыргақәҵа аартра ааркьаҿны имҩаԥган. Иалахәыз аиҿкааҩцәеи, аусумҭақәа равторцәеи, АИХ-қәа рхаҭарнакцәеи ракәын. Изҭахыз зегьы уи абара рылымшеит ҳәа лҳәоит Арсалиаԥҳа.
Аиҿкааҩцәа аԥкрақәа рышьҭахь аекспозициа ауаа иддырбаразы иҵәахны ирыман.
Ацәыргақәҵа аартызаауеит жәабран 14 - 21 рзы.
Ацәыргақәҵа "Ашықәс азы иреиӷьу аусумҭа" 2001 шықәса раахыс есышықәса имҩаԥыргоит Акультура аминистрреи Асахьаҭыхыҩцәа реидгылеи.