АҞӘА, жәабран 11 – Sputnik. Аҵыхәтәантәи аҩымчыбжь рыҩнуҵҟа ПЦР-тестқәа раҭаразы алабараториақәа ирыдҵаало ауаа рхыԥхьаӡара акыр еизҳаит, аха Аԥсны алабораториақәа русура еиламсрыда амҩаԥгара рылдыршеит ҳәа лҳәеит Агәабзиарахьчара аминистр иабжьгаҩ Алиса Матуаԥҳа жәабран 11 азы имҩаԥгаз апресс-конференциаҿ.
Матуаԥҳа илҳәеит, алабораториақәа русзуҩцәа есшьыжьы акоронавирустә инфекциа рымоу ирымаму аилкааразы рхы шгәарҭо.
Агәабзиарахьчара аминистр иабжьгаҩ илҳәеит, аминистрра иаус хаданы иҟоу алабораториақәа раангылара алмыршара шакәу.
Аԥсны аепидемиа ҵысижьҭеи аҿкчымазара зыхьхьоу ауаа рхыԥхьаӡара 48028-ҩык рҟынӡа инаӡеит, ргәы бзиахахьеит 39512-ҩык ауааԥсыра, рыԥсҭазаара иалҵхьеит 615-ҩык.