АҞӘА, жәабран 12 - Sputnik. Урыстәылатәи аҵаақәшьқьрааҩы Камила Валиева Аолимпиатә хәмаррақәа рахь лынашьҭраз аус аӡбамҭа еилкаахоит ашәахьа жәабран 14 амш аҩбатәи азбжазы ҳәа аҳәоит Аспорттә бжьаҟазаратә ӡбарҭа (CAS) арелиз аҟны.
Ари аус аӡбаҩцәаз иалхуп италиатәи Фабиа Иудика, америкатәи Џьеффри Бенц, асловиан Весна Бергант Ракочевич. Аус азыӡырҩра алагоит амҽыша 15:30 азы.
Жәларбжьаратәи атестҟаҵартә маҵзура (ITA) ахәаша аҳәамҭа ҟанаҵеит, Валиева 2021 шықәса ԥхынҷкәынмза 25 рзы иалҭаз адопинг-тест агәаҭарақәа рҿы триметазидин апрепарат шлылаз шышьақәырӷәӷәоу.
Стокгольмтәи адопингҿагыларазы алабораториа Валиева лтест аҭакқәа лырҭеит жәабран 8 рзы. Урыстәылатәи адопингҿагыларатә маҵзура ақәҵара аднакылеит Валиева аамҭала лынаскьагара, аха апеллиациа ашьҭахь жәабран 9 азы лара дырхынҳәуп. Уажәтәи аамҭазы аҵаақәшьқьрааҩы азин лыҭоуп Пекин имҩаԥысуа Аолимпиатә хәмаррақәа лхы рылархәра. Жәларбжьаратәи Алимпиатә комитети Жәларбжьаратәи адопингҿагыларатә маҵзуреи (WADA) ақәшаҳаҭым иагьаҿагылоит Аспорттә бжьаҟазаратә ӡбарҭа (CAS) иаднакылаз Валиева лганахь ала аӡбамҭа.