АҞӘА, жәабран 11 - Sputnik. Приднестровиатәи Молдавиатәи Ареспубликаҿы Аԥсны Аҳәынҭқарра Азинмчы змоу ахаҭарнак Александр Ватаман Приднестровие-Молдавиатәи Ареспублика Иреиҳаӡоу Асовет (Жәлар реизара-аред.) аҟны аиԥыларақәа жәпакы мҩаԥигеит, абри атәы аанацҳауеит Аԥсны ААР асаит.
Иреиҳаӡоу Асовет ахада Александр Коршунови Ватамани реиԥылара далахәын адәныҟатәи аполитика азҵаарақәа рзы ихаҭыԥуаҩ Сергеи Широков, иара убас ПМА иҟоу Аахыҵ Уаԥстәыла ахаҭарнак Витали Ианковски.
Ватаман иазгәеиҭеит Аԥсни, Аахыҵ Уаԥстәылеи, Приднестровиеи аиҩызаратә еизыҟазаашьақәа шрыбжьоу, апандемиа иахҟьаны урҭ маҷк иԥсыҽхазаргьы, Ватаман агәыӷра ааирԥшит азакәанԥҵаратәи анагӡаратәи русбарҭақәа рыбжьара иҟоу аусеицура ишацҵахо.
Иара убри аҽны имҩаԥысит Приднестровиа Молдавтәи ареспублика Иреиҳаӡоу Асовет ахантәаҩы ихаҭыԥуаҩ Александр Ватамани, азакәанԥҵареи азинхьчаратә усбарҭақәеи, атәылахьчареи, ашәарҭадареи, абжьаҟазаратә усқәеи, ауааԥсыра рзинқәеи рхақәиҭреи рыхьчараз ахеилак ахантәаҩы Галина Антиуфеевеи реиԥылара.
Аиԥылараҿы ирылацәажәеит еицырзыфеидоу азҵаарақәа, Аԥсны Жәлар реизарахь алхрақәагь налаҵаны. Агәаанагарақәа еимырдеит аԥсуа-приднестровиатәи русеицураз хра злоу азҵаарақәа.