АҞӘА, жәабран 13 - Sputnik. Аҟәатәи атаибоксиорцәа аԥхьахәтә ҭыԥқәа ааныркылеит Аладатәии Нхыҵ-Кавказтәии афедералтә округқәа рчемпионати раԥхьахәгареи рҿы ҳәа аанацҳауеит Аԥсны Аспорт азы аҳәынҭеилакы.
Аԥсуа спортсменцәа фҩык актәи аҭыԥқәа ргеит, хәҩык - аҩбатәи аҭыԥқәа, хҩык - ахԥатәи. Атаибоксиор Леон Амҷба иакәзар, "Аладатәи афедералтә округи Нхыҵ-Кавказтәи афедералтә округи иреиӷьӡоу рықәԥаҩ" ҳәа дазгәаҭан.
Аԥсны Атаитә бокс азы афедерациа ахада Ҭеимураз Гьергьедаа иажәақәа рыла, 14-ҩык аԥснытәи аспортсменцәа рахьтә 13-ҩык Урыстәыла ачемпионати аԥхьахәгареи рахь иалырхит.
Аладатәии Нхыҵ-Кавказтәии афедералтә округқәа рчемпионати раԥхьахәгареи мҩаԥысуан Шәача жәабран 8-13 рзы. Уи иалахәын 500-ҩык аспортсменцәа Урыстәыла арегионқәа 20 рҟынтәи. Атурнир алҵшәақәа рыла Урыстәыла ачемпионати аԥхьахәгареи рахь аспортсменцәа алххоит.
Аԥснытәи аспортсменцәа Краснодартәи атәылаҿацә азы иқәгылон.