АҞӘА, жәабран 15 – Sputnik. Аҳәынҭқарратә Дума адепутатцәа Донецктәии Лугансктәии Жәлар рреспубликақәа разхаҵаразы ақәҵара рыдкыланы апроект Владимир Путин изынарышьҭуеит ҳәа аанцҳауеит РИА Новости.
Адокумент абжьыҭараан абжьеиҳа аиуит. Апарламент алахәылацәа КПРФи "Иаку Урыстәылеи" ирыдыргалаз ақәҵара апроектқәа ирықәшаҳаҭхеит. Актәи авариант Урыстәыла ахада изынарышьҭуеит, аҩбатәи - Адәныҟатәи аусқәа рминистррахь абжьгараҭаразы.
Акоммунисттә партиа ирыднагалаз апроект азы рыбжьы арҭеит 351-ҩык адепутатцәа, иаҿагылеит 16-ҩык. "Иаку Урыстәыла" апроект азы рыбжьы арҭеит 310-ҩык адепутатцәа.
Бжьыҭарала иалхын Владимир Путин изырышьҭуа авариант.
"Адепутатцәа иазырыԥхьаӡоит ДЖәРеи ЛЖәРеи разхаҵара ареспубликақәа руааԥсыра ршәарҭадареи рыхьчареи алдыршоит, арегион аҿы аҭынчреи аҭышәынтәалареи еиҿнакаауеит", - ҳәа иҳәеит Аҳәынҭқарратә Дума аиҳабы Виачеслав Володин.
Володин иҳәеит, Киев Минсктәи аиқәшаҳаҭрақәа иахьрызхьамԥшуа Донбасс инхо Урыстәыла атәылауаа рзы ишәарҭоуп ҳәа.
Аҳәынҭқарратә суверинитет ахьчаразы Афедерациатә хеилак акомиссиа ахантәаҩы Андреи Климов иҳәамҭала ари аӡбамҭа урыстәылаа реиҳараҩык иргәаанагароуп ҳәа.
Климов иҳәеит, адокумент атәыла ахда изынашьҭуп ихаҭа аӡбра идикыларц ҳәа.
Москва агәаанагарала Киев бџьарла еибызҭо мраҭашәаратәи атәылақәа арегион аҿы аҭынчра еиҵарҟьоит.