АҞӘА, жәабран 16 - Sputnik. Аԥсны адәныҟатәи аусқәа рминистр Инал Арӡынба Москва ателеканал "Russia Today", МИА "Россия сегодня", аинформациатә маҵзура "Sputnik" рредактор хада Маргарита Симониан лԥылараан Аԥсны ААР амедиацентр аусура амеханизм иалацәажәеит. Абри атәы аанацҳауеит аусбарҭа апресс-маҵзура.
Хаҭала ирзааҭгылан амедиацентри Урыстәыла аинформациатә маҵзурақәеи реинырра ашьақәыргылара.
Иара убасгьы ирылацәажәан, жәларбжьаратәи аинформациатә политикеи Аԥсны ахьӡ аҭыгара аиҿкаареи.
Аԥсны адәныҟатәи аусқәа рминистрра аҽазнархиоит амедиацентр аартра, иара хықәкы хадас иамоуп Аԥсны апозициа Жәларбжьаратәи аинформациатә политикаҿ арӷәӷәара. Амедиацентр ҿыц аус аулоит Урыстәыла ААР аинформациеи акьыԥхьи р-Департамент ацхыраарала.
Амедиацентр аусзуҩцәа жәларбжьаратәи аинформациа, адунеитә АИХқәа, асоциалтә ҳақәа анализ рзыҟарҵалоит, Аԥсны аҳаҭыр шьҭызхуа аинформациатә усхкқәа мҩаԥыргалоит.