АҞӘА, жәабран 17 – Sputnik. Ареспублика Никарагуа ахь инашьҭу азинмч нагӡеи анапынҵа ҷыдақәеи змоу Аԥсны Аҳәынҭқарра ацҳаражәҳәаҩ Инар Ладариа Никарагуа Адәныҟатәи аусқәа рминистр Денис Монкада Агәраргагатә шәҟәқәа ииҭеит. Абри атәы аанацҳауеит Аԥсны ААР апресс-маҵзура.
Денис Монкада Инар Ладариа идиныҳәалеит Ареспублика Никарагуа идипломатиатә миссиа алагара, агәыӷра ааирԥшит активла иусура шымҩаԥиго азы Манагуеи Аҟәеи ԥхьаҟатәи русеицура арӷәӷәаразы.
Инар Ладариа Аԥсны Аҳәынҭқарра ахада Аслан Бжьаниеи Адәныҟатәи аусқәа рминистр Инал Арӡынбеи рҟынтәи никарагуатәи ажәлар асалам риҭеит.
Инар Ладариа Аԥсны азинмчра нагӡеи иҷыдоуи анапынҵақәа змоу ацҳаражәҳәаҩс Никарагуа дҟаҵан ԥхынҷкәын 17, 2021 шықәсазы.
Никарагуа Аԥсны Аҳәынҭқарра ахьыԥшымра азханаҵеит цәыббра 4, 2008 шықәсазы. Шықәсык ашьҭахь аҩ-тәылак рыҟны адипломатиатә еизыҟазаашьақәа шьақәыргылан.