Ажьырныҳәа 27 раахыс Аԥсны ашколқәа акарантин ахь ишьҭуп аепидемиологиатә ҭагылазаашьа аицәахареи, аҵаҩцәеи арҵаҩцәеи рыбжьара аҿкы зыхьуа рхыԥхьаӡара ахьеизҳази иахҟьаны. Аҵыхәтәан иҟаҵаз адыррала, акарантин аҿҳәара жәабран 21-нӡа иацҵан.
"Уаҵәы иахмырԥаӡакәа Гагра араион ахадараҟны аштаб аилатәара ҳазыԥшуп. Агәра ганы ҳаҟоуп ирыдыркылап аӡбамҭа, амҩагьы ҳақәырҵап ашәахьа ашколқәеи ахәыҷбаҳчақәеи русура хацыркхо, мамзаргьы даҽа хәыҷык инаскьагахо азы", - лҳәеит Ажьиԥҳа.
Лара иазгәалҭеит аепидемиологиатә ҭагылазаашьа арҭ ахымчыбжьа иаҳа ишеиӷьхаз, араион аҟны иахьазы арҵаҩцәеи ааӡаҩцәеи рыбжьара 17-ҩык роуп ачымазараҿкы змоу, акарантин ахь ианцоз ичмазаҩын 97-ҩык.
Аицәажәара иаҳа инарҭбааны ишәаҳар шәылшоит аудиофаил аҟны.