АҞӘА, жәабран 17 – Sputnik. Аԥсны газла аиқәыршәара асхема хада аус адызуло анардадатә еиҿкаара аҟазауаа еиуеиԥшым асценариқәа ааргеит. Абри атәы аанацҳауеит аекономика аминистрра апресс-маҵзура.
Ахаша жәабран 16 азы Аекономика аминистрраҿы имҩаԥысит аԥыза-министр ихаҭыԥуаҩ, аекономика аминистр Кристины Озган дызлахәыз аилацәажәара.
Аганқәа алацәажәеит иаҳхысыз ашықәс ԥхынҷкәынмзазы ишьақәырӷәӷәаз ауснагӡатәқәа рыплан актәи ахәҭа рымҩаԥгара иадҳәалоу азҵаарақәа.
Урыстәылатәи аҟазауаа аԥсуа ган иадыргалеит абарҭ асценариқәа:
Агазцәаҳәа аиҿкаара,
Автономтә газеиҿкаара иӡшьартәу аԥсабаратә газ ала,
Аенергетикатә ргыларақәа газла реиқәыршәара.
Анардадатә еиҿкаара ахаҭарнакцәа Кристина Озган илзеиҭарҳәеит имҩаԥыргахьоу аусурақәа рылҵшәақәа ртәы, ажәалагала ҟарҵеит аҭыԥантәи алшарақәа ҭҵаазарц ԥхьаҟазы ареспублика асоциал-економикатә ҿиара азԥхьагәаҭаны.