АҞӘА, жәабран 21 - Sputnik. Франциа ахада Еммануэль Макрон ажәадгала ҟаиҵеит Урыстәыла ахада Владимир Путини Америка ахада Џьо Баидени асаммит мҩаԥыргарц. Аганқәа рыҩбагьы ажәадгала иақәшаҳаҭхеит ҳәа аҩуеит РИА Новости Елисеитәи ахан адыррақәа шьаҭас иганы.
"Франциа ахада Еммануэль Макрон ажәадгала ҟаиҵеит Урыстәыла ахада Владимир Путини Америка ахада Џьо Баидени асаммит мҩаԥыргарц Европа ашәарҭадареи астратегиатә ҭышәынтәалареи рызҵаарақәа рылацәажәаразы. Аганқәа рыҩбагьы ажәадгала иақәшаҳаҭхеит", - аҳәоит аҳәамҭаҿы.
Асаммит амҩаԥгара алшоит "Урыстәыла Украина иақәымлар". Москва зынӡагьы иақәшаҳаҭым Мраҭашәараа ргәаанагаразы.
Аҩны шкәакәа ахаҭарнак Џьен Псаки Париж иҟанаҵаз аҳәамҭа шьақәлырӷәӷәоит.
Урыстәыла Украина иақәлоит ҳәа рыладырҵәоит аурыс архәҭақәа аҽазыҟаҵарақәа рышьҭахь рҭыԥ ахь ишыхынҳәхьоугьы.