АҞӘА, жәабран 23 - Sputnik. Омикрон-штамм иццакны алаҵәара иахҟьаны Урыстәыла Агәабзиарахьчара аминистрра ишьақәнарӷәӷәеит COVID-19 азыԥхьагәаҭара, ахәшәтәра, адиагностика рзы абжьгара ҿыцқәа, абри атәы аанацҳауеит аусбарҭа асаит.
Ахәшәтәразы абьарақәа азырхиан аҵыхәтәантәи аҭҵаарақәа рхархәарала.
Аԥкаанаҵақәа рҟны иарбоуп аҿкчымазара ззышьақәырӷәӷәоу ашәарҭара зцу агәыԥ иаҵанакуа амедицинатә цхыраара рыҭара аиҿкаара, авирус зырԥсыҽуа амоноклоналтә цәеижьҿагылақәа рхархәара.
COVID-19 ахәшәтәраҿы ихадоуп, аҿкы зцәа иалоу иԥсҭазаара ашәарҭара иҭазыргыло аҭагылазаашьахь днеиаанӡа азыԥхьагәаҭаратә уснагӡатәқәа рымҩаԥгара.
Уи адагьы аметодикатә абжьгарақәа рахь иаҵанакуеит COVID-19 марианы, ма ибжьаратәны изхызго, ма ОРВИ, аимҳәа змоу апациентцәа рхәышәтәра асхема.
Агәабзиарахьчара аминистр Михаил Мурашко иажәақәа рыла, аметодика ҿыцқәа омикрон зыдбалоу ачымазцәа ирлас рыхәшәтәра алныршоит, избан акәзар иҟоуп ари аштамм арԥсыҽразы илҵшәадоу ахәшәқәа.