АҞӘА, хәажәкыра 1 - Sputnik, Наала Гәымԥҳа. Аԥкрақәа рнаҩс жәабран 28 рзы аусура хацнаркит Аԥсуа ҳәынҭқарратә Аҿар ртеатр Д. Псафас иҩымҭала ақәыргыламҭа "Амцҳәаҩ даҭахуп" ала.
Аҿар ртеатр аиҳабы Аслан Еныкь шықәсык аахыс зусура аанкылаз атеатр аԥсҭазаашьа дазааҭгыло, иҳәеит ари амш акраамҭа ишазыԥшыз, актиорцәа раԥхьаӡакәны асценахь ицәырҵуазшәа ргәы шыхыҭхыҭуаз.
"Аԥкрақәа рышьҭахь ари раԥхьаӡатәи культуратә цәырҵроуп. Уи хымԥада ҳгәалаҟазаара шьҭнахуеит. Есымшааира ҳаззыԥшыз ныҳәак иаҳзаҩызахеит, актиорцәа ргәы хыҭхыҭуан, асцена гәхьааганы иҟан. Исҳәарц сҭахуп, ҳусура еиԥҟьаӡамызт еснагь аҽазыҟаҵарақәа ҳарҿын", - ҳәа иҳәеит Еныкь.
Аԥсуа ҳәынҭқарратә Аҿар ртеатр аспектакль "Амцҳәаҩ даҭахуп"
© Sputnik
Сааҭк инеиҳаны ицоз аспектакль ашьҭахь, уи иалахәыз актиор Аслан Анқәаб иҳәеит, актиорцәа ишырцәыуадаҩыз акраамҭа ахәаԥшцәеи дареи аимадара ахьрымамыз.
"Иахьатәи аспекталь аԥхьарбара ҳахәмаруазшәа ауп ҳшазнеиз, избан акәзар шықәсык инарзынаԥшуа асцена ҳацәхҟьаны ҳаҟан. Акраамҭа ауаҩы иус дацәхьаҵны даныҟоу анаҩс даназыхынҳәуа, даҽа цәаныррак изцәырҵуеит, еиҳа аҭакԥхықәра иднаҵоит", - ҳәа иҳәеит актиор Аслан Анқәаб.
Аҿар ртеатр аиҳабы ԥхьаҟатәи рыгәҭакқәа дырзааҭгыло, иҳәеит апремиера аус шадыруло, уи хара имгакәан ахәаԥшцәа ишрыдгылахо атәы.
"Аспектакль ҿыц иқәҳаргыло Бранислав Нушич ипиеса иалху "Лхаҵкы аминистр иԥҳәыс" ауп. Еиҭалгеит Софа Агәмааԥҳа, уи ықәзыргыло арежиссиор Есма Џьниаԥҳа лоуп", - ҳәа азгәеиҭеит Аслан Еныкь.
Аԥсны агәабзиарахьчара аминистрра ишьақәнарӷәӷәаз асанитартә ԥҟарақәа инарықәыршәаны ажьырныҳәа 25 инаркны русура ахацыркразы азин рыҭан акультура аусбарҭақәеи аспорттә хыбрақәеи.