АҞӘА, хәажәкыра 7 - Sputnik. Анталиатәи адипломатиатә форум аҟны Урыстәылеи Украинеи рыдәныҟа политикатә усбарҭақәа рхадацәа реиԥылара азгәаҭоуп Ҭырқәтәылатәи адәныҟатәи аусқәа рминистр далархәны, абри атәы РИА Новости аҟны илҳәеит урыстәылатәи адиплоатиатә усбарҭа ахаҭарнак ҷыда Мариа Захарова.
"Урыстәылеи Ҭырқәтәылеи рхадацәа ҭелла реицәажәааран иззааибагаз аиқәшаҳара инақәыршәаны, ҭырқәтәылатәи ахада иаԥшьгамҭала Анталиатәи адипломатиатә форум аҟны иазгәаҭахоит Урыстәыла адәныҟатәи аусқәа рминистр Сергеи Лаврови Украина адәныҟатәи аусқәа рминистр Дмитри Кулеби реиԥылара Ҭырқәтәылатәи адәныҟатәи аусқәа рминистр Мевлиут Чавушоглу далархәны", - лҳәеит лара.
Афорум аофициалтә саит аҟны ишазгәаҭоу ала, сынтәа афорум мҩаԥгахоит хәажәкыра 11- 13 рзы.
Хәажәкыра 6 азы Урыстәылеи Ҭырқәтәылеи рхадацәа ҭелла реицәажәараан Путин Ердоган изеиҭеиҳәеит Украина иалагалоу Донбасс ахьчаразы арратә аоперациа ҷыда ахықәкы хадеи анапынҵақәеи. Убри аан Путин иазгәеиҭеит, иара шцо иарбоу ауснагӡа инақәыршәаны, иазԥҵәоу аҿҳәарақәа рыҽҭагӡаны. Аоперациа ҷыда аанкылахар алшоит Киев аибашьра иаҟәыҵны Урыстәыла иқәнаргыло адҵақәа нанагӡар.