Аԥснынтәи Урыстәылаҟа амаининг-хархәагақәа риагара аанкылан

АҞӘА, хәажәкыра 11 - Sputnik. Аушьҭырҭатә ҭыԥ "Адлер" аҿы шәҟәы ацӡамкәа акриптоԥара арҳаразы ахархәагақәа ааныркылеит урыстәылатәи аҳазалхыҩцәа аурыс-аԥсуа ҳәааҿы агәаҭарақәа рымҩаԥгараан ҳәа аанацҳауеит Краснодартәи аҳазалхырҭа Шәача ақалақьтә маҵзура апресс-маҵзура.

Аԥснынтәи аҳәаахь инеиз аидарамҩангага автомашьына DAFCF аушьҭырҭатә ҭыԥ "Адлер" аҿы иааныркылеит. Амашьына аԥсҟы зкыз, 1977 шықәсазы Аԥсны ииз, ашәҟәы иҭагалатәу атауар сымам ҳәа иҳәеит.

Автомашьына МИДК ахархәарала игәаҭан. Агәаҭараан атранспорттә хархәага акабинаҿы иаарԥшын асалафан илаҳәаз аметалл иалху апластинақәа, аелектронтә платқәа рсахьа рыманы (27 цыра - 45 кьыла).

Аҳазалхыҩцәа ргәаанагарала урҭ хеш-платқәоуп. Атауар азы ашәҟәқәа амашьына арныҟәцаҩ имамызт, изызкыз ҳәагьы акгьы изымҳәеит.

Аҳазалхыҩцәа атауар аекспертизахь агәаҭаразы инарышьҭит. Иҟаз ахҭыс аганахь ала административтә зинеилагара ҳәа аус хацыркуп: Урыстәыла АЗ ахәҭаҷ 16.2 ахәҭа (ашәҟәы иҭагалам атауар азы административтә ҭакԥхықәра, ииашамкәа атауар ашәҟәы аҭагалара) ала. Иара инақәыршәаны административтә хараԥса иартәоит: атауар ахә ҩынтәла ашәара, атауар амхра. Имҩаԥысуеит административтә усҭҵаара.