АҞӘА, хәажәкыра 11 - Sputnik. Аҳәаанырцә, Нидерландиеи Ирландиеи урыстәылатәи Ацҳаражәҳәарҭақәа иахьрықәлаз, Франциа Россотрудничество иахьақәлаз азы Ашьаусҭҵааратә еилакы аҭҵаарақәа мҩаԥнагоит ҳәа аанацҳауеит аусбарҭа асаит.
"Имҩаԥгаз аҭҵаарақәа инарықәыршәаны Урыстәыла Ашьаусҭҵааратә еилакы х-уск хацнаркит Нидерландиеи Ирландиеи иҟоу урыстәылатәи Ацҳаражәҳәарҭақәеи Франциа Россотрудничествои иахьақәлаз азы. Имҩаԥгоу ацәгьоура УА АЗ 360-тәи ахәҭаҷ 2-тәи ахәҭа иаҵанакуеит", - аҳәоит адырраҭараҿы.
Аусбарҭа адыррала жәабран 28 азы Нидерландиа иҟоу Ацҳаражәҳәарҭа апетардақәа агәыдырҵеит, амиссиа атранспорт ааха арҭеит.
Хәажәкыра 7 азы Дублин идырым аӡәы Ацҳаражәҳәарҭа агәашә дажәлеит. Иара убри амш азы Париж Россотрудничество ахыбра иақәлеит.
"Еиқәыԥхьаӡоу ахҭысқәа урыстәылатәи аусҳәарҭақәа русзуҩцәа ашәарҭара иҭанаргылоит, русура еиԥырҟьоит. Ацҳаражәҳәарҭа амазара аԥхасҭа аҭоуп", - рҳәоит аилак аҿы.
Убри аан, иқәылаз изусҭцәоу рзымдырырц залшом, арҭ ахыбрақәа жәларбжьаратәи ахьчара шрымоу.
Аусҭҵаара ахҭысқәа рыҟалашьа шьақәнаргылоит, уи ашьҭахь иазнархиоит иахәҭаны ишьоу азыҳәақәа аҳәаанырцәтәи аҳәынҭқаррақәа изыхәҭоу русбарҭақәа рахь.